3 ოქტომბერს ერთ-ერთმა სომხურენოვანმა ფეისბუქ გვერდმა გამოაქვეყნა ვიდეო, რომელშიც საუბარია, თითქოს ბორჯომის რკინიგზის სადგურიდან ხდება აზერბაიჯანისთვის სამხედრო ტექნიკის მიწოდება. ვიდეოში ჩანს მანქანიდან გადაღებული კადრები, რომლებზეც ასახულია შენობები, რკინიგზა, სატვირთო მანქანები და რამდენიმე ტანკი.
გავრცელებული ვიდეო არ წარმოადგენს იმის მტკიცებულებას, რომ საქართველოს ტერიტორიიდან აზერბაიჯანში სამხედრო ტექნიკის გადატანა მიმდინარეობს. ასევე რთულია იმის იდენტიფიცირება, თუ სად და როდის არის გადაღებული ვიდეო. გავრცელებულ ცნობებს საგარეო საქმეთა სამინისტრო და საქართველოში სომხეთის საელჩოც უარყოფენ.
გავრცელებულ ცნობებს გამოეხმაურა საქართველოს საგარეო საქმეთა მინისტრის მოადგილე ლაშა დარსალია, რომელმაც აღნიშნა, რომ საქართველოდან აზერბაიჯანის ტერიტორიაზე სამხედრო ტექნიკის გადატანის შესახებ ცნობები ცალსახად დეზინფორმაციაა.
საქართველოში სომხეთის საელჩომ განაცხადა, რომ ცნობები საქართველოდან აზერბაიჯანისთვის იარაღის მიწოდების შესახებ, დეზინფორმაციაა.
„გაცნობებთ, რომ ინტერნეტში გავრცელებული ვიდეო, რომლის თანახმადაც, თითქოს სამხედრო აღჭურვილობა, რომელიც ბორჯომშია გადაღებული, აზერბაიჯანს გადაეცემა, არ შეესაბამება სიმართლეს. სამხედრო აღჭურვილობა, რაც ვიდეოშია ნაჩვენები, ეკუთვნის საქართველოს შეიარაღებულ ძალებს და გადაადგილება ხორციელდებოდა საქართველოს უსაფრთხოების ინტერესებიდან გამომდინარე“ – აცხადებენ საელჩოში.
ასევე აღსანიშნავია, რომ აზერბაიჯანსა და სომხეთს შორის მიმდინარე სამხედრო მოქმედებების გამო, საქართველომ დროებით შეაჩერა ნებართვების გაცემა საკუთარ ტერიტორიაზე სახმელეთო და საჰაერო მარშუტებით სამხედრო ტვირთის გატარებაზე როგორც სომხეთის, ისე აზერბაიჯანის მიმართულებით და როგორც საგარეო საქმეთა მინისტრი დავით ზალკალიანი აღნიშნავს, ამის თაობაზე ისინი ინფორმირებულნიც იყვნენ.
მთიანი ყარაბახის კონფლიქტის გააქტიურების ფონზე პერიოდულად ხდება დეზინფორმაციების გავრცელებაც, რაც საზოგადოებაში შუღლის გაღვივებას ისახავს მიზნად. 4 ოქტომბერს ვრცელდებოდა დასპონსორებული პოსტი, ნახატით, სადაც ახალქალაქი და ახლალციხე წითლად არის მონიშნული, და დეზინფორმაციული ტექსტით “Akhalkalaki is Armenia. Akhaltsikhe is Armenia.” პოსტს ავრცელებდა 29 სექტემბერს შექმნილი გვერდი, რომელსაც სხვა კონტენტი განთავსებული არ აქვს, რაც ქმნის შთაბეჭდილებას, რომ აღნიშნული გვერდი სწორედ მსგავსი პროვოკაციული პოსტის გასავრცელებლად შეიქმნა. ამას გარდა, ზიარდებოდა დეზინფორმაციული ვიდეოც, სადაც თითქოს თურქეთიდან საქართველოს გავლით ხდებოდა აზერბაიჯანში სამხედრო ტექნიკის გადატანა, არ დადასტურდა.
