რუსულენოვანი მედიასაშუალებები (Riafan.ru, Planeta RTR და სოციალური ქსელის მომხმარებლები (Dmitry Gromkov, Галина Любимова, Bella Shogenova,) აქტიურად ავრცელებენ უკრაინის პრეზიენტის ვოლოდიმირ ზელენსკის ვიდეოს, რომელშიც მათი მტკიცებით, ზელენსკი ნარკოტიკული ზემოქმედების ქვეშ იმყოფება, ხოლო კადრებში მაგიდაზე დარჩენილი კოკაინის კვალი და შეფუთვაც ჩანს. Riafan.ru-ს მიხედვით, ზელენსკის მაგიდაზე კოკაინის შეფუთვის კვალი გერმანელმა ჟურნალისტებმა აღმოაჩინეს. Riafan.ru გერმანულენოვან გამოცემა report24.news-ს ეყრდნობა.
მტკიცება იმის შესახებ, რომ გავრცელებული ვიდეოში ზელენსკის მაგიდაზე კოკაინის შეფუთვები და ნარკოტიკების კვალი ჩანს, დეზინფორმაციაა. რეალურად, ვიდეოს თავდაპირველ, მაღალი ხარისხის ვერსიაში მკაფიოდ ჩანს, რომ კადრებში მაგიდის დეკორი, ჩარჩოს ჩრდილები და ტელეფონის 2 დამტენია ასახული.
ვიდეო, რომელსაც რუსულენოვანი გამოცემები და მომხმარებლები აქტირუად ავრცელებენ, ვოლოდიმიერ ზელენსკის ოფიციალურ ინსტაგრამ არხზე 17 აპრილს გამოქვეყნდა. ვიდეო გვიან ღამითაა ჩაწერილი, რომელშიც უკრაინის პრეზიდენტი თავის სამუშაო გარემოს აჩვენებს. ორიგინალ, მაღალი ხარისხის ვიდეოში ჩანს, რომ ვიდეოში მოხვედრილი თეთრი ზოლები, რეალურად, ზელენსკის სამუშაო მაგიდის დეკორისა და ოჯახის ფოტოს ჩარჩოს ანარეკლია.
მუქი მწვანე ფერის სამუშაო მაგიდა ზელენსკის სხვა ვიდეოებსა და ფოტოებშიც ჩანს, ყველა მათგანში აშკარაა, რომ მაგიდა ორი ოქროსფერი ზოლითაა გაფორმებული.
რაც შეეხება დანარჩენ თეთრ ზოლებს, მაღალი ხარისხის ვიდეოში ადვილი შესამჩნევია, რომ ისინი რეალურად განათების შედეგად შექმნილი სურათის ჩარჩოს ანარეკლებია.
რუსულენოვანი ფეისბუქ მომხმარებლები ამტკიცებდნენ იმასაც, რომ ვიდეოში ნარკოტიკის შეფუთვაც ჩანს, თუმცა რეალურად მაღალი ხარისხის ვიდეოში ნათლად ჩანს, თეთრი ნივთი არა ნარკოტიკის შეფუთვა, არამედ ტელეფონის დამტენია.
სოციალურ მედიაში საჭვოდ მიიჩნევდნენ ზელენსკის მაგიდაზე მდგარ კიდევ ერთ ნივთს. Riafun.ru-ს მიხედვით, გერმანელმა ჟურნალისტებმა შავ ნივთზე მოთავსებული თეთრი პატარა გორგალი ევროპაში გავრცელებულ კოკაინის შეფუთვებს მიამსგავსეს.
რეალურად, მაღალი ხარისხის ვიდეოში აშკარად ჩანს, რომ ოჯახის ფოტოსთან ახლოს აიფონის სადგამი შავი ფერის დამტენი დევს და მის თავზე არა კოკაინის შეფუთვა, არამედ დამტენის თავია დამაგრებული.
ასეთი დამტენების შეძენა ნებისმიერ მსურველს სხვადასხვა ონლაინ მაღაზიაში შეუძლია.
აღსანიშნავია ისიც, რომ გერმანულენოვან გამოცემა report24.news-ის მასალა, რომელსაც Riafan.ru ეყრდნობა, არაერთმა ფაქტების ანალიტიკოსმა ორგანიზაციამ გადაამოწმა.
რუსულენოვანი მომხმარებლები ვიდეოში ზელენსკის სკამზე რამდენჯერმე განმეორებითი ტრიალის კადრებს იმის დასადასტურებლად იყენებდნენ, რომ ზელენსკი ნარკოტიკების ზემოქმედების ქვეშ იმყოფებოდა. რეალურად, ზელენსკი სკამის საშუალებით სულ 2-ჯერ: ოჯახის ფოტოსა და უკანა მაგიდაზე მდგარი მამლის ქანდაკების საჩვენებლად ტრიალდება.
ყალბი მტკიცებები იმის შესახებ, რომ ზელენსკი ნარკოტიკებს მოიხმარს და ამას მისი სხვადასხვა ვიდეო ადასტურებს, საქართველოსა და რუსეთში წარსულშიც რამდენჯერმე გავრცელდა. ვრცლად იხილეთ “მითების დეტექტორის” მასალები:
- ზელენსკისა და მასკის საუბრის პროგრამულად დამუშავებულ ვიდეოში კოკაინი და საბანკო ბარათია დამატებული
- ყავა, ნარკოტიკები თუ სპორტი – რაზე საუბრობდა ზელენსკი რეალურად?
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
