2 თებერვალს Russia 1 – ის გადაცემაში “Вести” 11:00 საათიან გამოშვებაში (38:18 წუთზე) გავრცელდა ინფორმაცია, რომ ჩინური ჩატბოტი DeepSeek საბჭოთა კოდის საფუძველზე შეიქმნა და ამის შესახებ მისმა დამფუძნებელმა ლიანგ ვენფენგმა, ინტერვიუში ისაუბრა. იგივე ინფორმაცია geworld.ge -მა და ფეისბუკის რუსულენოვანმა ანგარიშებმაც (1, 2, 3, 4) გამოაქვეყნეს. სტატიის მიხედვით, აღნიშნული კოდი ჯერ კიდევ 1985 წელს დაიწერა.
მტკიცება, თითქოს ჩინური ჩატბოტი DeepSeek საბჭოთა კოდის საფუძველზე შიქმნა სიმართლეს არ შეესაბამება და რუსული სატირული გამოცემის Панорама-ის ხუმრობაა.
Панорама – ის გვერდზე სტატია ჩინური ჩატბოტის შესახებ 29 იანვარს გამოქვეყნდა. ტექსტში აღნიშნულია, რომ DeepSeek – ის ხელმძღვანელის, ლიანგ ვენფენგის თქმით, მათი პროდუქტი საბჭოთა კოდზე დაყრდნობით შეიქმნა.
”ვერ მოვიტყუები, ჩვენი ხელოვნური ინტელექტი საბჭოთა ბაზაზე, კერძოდ, აკადემიკოს გლუშკოვის OGAS სისტემის საფუძველზე შეიქმნა”, – თითქოს თქვა ვენფენგმა ამერიკელი ბლოგერის ლექს ფრიდმანის იუთუბ-არხზე, ინტერვიუში. – მის გარეშე, ჩვენ ვერასდროს დავეწეოდით ამერიკელებს და მათ ChatGPT-ს.
Панорама – ის მიხედვით, ვენფენგი უახლოეს მომავალში გეგმავს ვიქტორ გლუშკოვის სახელობის პრიზის დაარსებას, ასევე პეკინში მუზეუმის გახსნას, რომელიც სსრკ-ს სამეცნიერო მიღწევებს მიეძღვნება.
აღსანიშნავია,რომ ეს სიახლე რუსულ მედიაში აქტიურად გავრცელდა, თუმცა, მათმა დიდმა უმრავლესობამ ტექსტში მიუთითა, რომ ამბავი სატირულ გამოცემას ეყრდნობოდა. გამოცემა Панорама X-ზე გამოეხმაურა Россия 1-ის გადაცემის Вести-ის ვიდეოს, რომელშიც ასევე აღნიშნულია, რომ DeepSeek საბჭოთა კოდის საფუძველზე შეიქმნა. Панорама ვიდეოს შემდეგი სათაურით აქვეყნებს: ეს მოსალოდნელი იყო – პანორამა ტელევიზორში დაბრუნდა. ამ თემაზე სტატია რუსულმა გამოცემა meduza – ც მოამზადა.
სიახლე ჩინური ჩატბოტის DeepSeek-ის შესახებ იანვრის ბოლოს გამოჩნდა. ჩატბოტს შეუძლია ტექსტების გაანალიზება, ესეების დაწერა და პროგრამის კოდების შექმნა, დაახლოებით ისე, როგორც ChatGPT- ს.
სატირული საიტის panorama.pub -ის გვერდზე გამოქვეყნებულია გაფრთხილება, რომ მასზე განთავსებული ამბები რეალური სიახლეები არ არის და “რეალობის გროტესკული პაროდიაა”. გარდა ამისა, საიტის ლოგოზეც მითითებულია, რომ გამოცემა სატირული შინაარსისაა.
Panorama-ს მიერ გამოგონილი სატირული ინფორმაციები რეალური ფაქტების სახით აქამდეც ბევრჯერ გავრცელებულა და “მითების დეტექტორს” ამ თემაზე არაერთი სტატია აქვს მომზადებული.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
