20-24 აპრილს მედიაში გავრცელდა ინფორმაცია, რომლის მიხედვითაც ჩინეთში პირველად გაუშვეს 10G ინტერნეტი. სტატიებში მოცემული ინფორმაციის მიხედვით, ახალი ქსელის ჩამოტვირთვის სიჩქარე აღწევს 9834 მეგაბიტს წამში, ხოლო ატვირთვისა – 1008 მეგაბიტს წამში, სტაბილური დაყოვნება კი მხოლოდ სამი მიკროწამია. აღნიშნული ინფორმაცია ასევე აქტიურად ვრცელდება ფეისბუქ ანგარიშებზეც.
მიუხედავად იმისა, რომ მედიაში 10G ინტერნეტის შესახებ გავრცელებული დეტალები სწორია, ინფორმაცია მკითხველთა ნაწილისთვის შეცდომაში შემყვანი აღმოჩნდა, რადგან ფეისბუქ მომხმარებლები მას 5G ინტერნეტის გაუმჯობესებულ ვერსიად ანუ მეათე თაობის ინტერნეტად აღიქვამენ. რეალურად კი 10G ნიშნავს 10 გეგაბიტ წამში სიჩქარეს და არა მეათე თაობას და ის საერთოდ სხვა ტექნოლოგიას წარმოადგენს.
უკნასკნელ დღეებში არაერთ საიტზე გავრცელდა ინფორმაცია იმის შესახებ, რომ ჩინეთმა ჰებეის პროვინციის ერთ-ერთ ქალაქში მოსახლეობისთვის ხელმისაწვდომი გახადა 10G ფართოზოლოვანი ინტერნეტი, რომელიც საოცრად სწრაფია და ჩამოტვირთვის სიჩქარე თითქმის 10გბ/წმ-ს აღწევს (9834). ტექნოლოგიის შექმნა და განვითარება მოხერხდა ადგილობრივი გიგანტური კომპანიების ჰუავეისა (Huawei) და ჩინეთის უნიკომის (Unicom) თანამშრომლობის შედეგად. სტატიებში ვკთხულობთ, რომ ეს შესაძლებელი გახდა 50G პასიური ოპტიკური ქსელის გამოყენებით, რომელიც საშუალებას იძლევა დამატებითი ელექტრონული გამაძლიერებლების გამოყენების გარეშე, უკვე არსებულ ოპტიკურ-ბოჭკოვანი ინფრასტრუქტურის გავლით, ბევრად უფრო დიდი მოცულობის ინფორმაციის გატარებას. საგულისხმოა, რომ ფეისბუქზე გავრცელებულ ზოგიერთ პოსტში ეს დეტალი გამოტოვებულია. აღნიშნული ინფორმაციის გავრცელებამ დაბნეულობა გამოიწვია მკითხველებში, რადგან მათმა ნაწილმა 10G აღიქვა 5G ინტერნეტის ახალ, გაუმჯობესებულ ვერსიად. რეალურად კი, ისინი სხვადასხვა ტექნოლოგიაა. 5G ნიშნავს მეხუთე თაობის ინტერნეტს, 10G-ში კი “G” არა თაობას, არამედ გეგაბიტს აღნიშნავს, რადგან მისი სიჩქარე თითქმის 10 გბ/წმ-ს აღწევს. ამის შესახებ განმარტება არაერთ მედიასა და ტექნოლოგიების საიტზე გავრცელდა. ამ სტატიებში ვკითხულობთ, რომ სინამდვილეში ჩინელების ეს გამოგონება ეხება საკაბელო ინტერნეტს, რომელიც ძირითადად ოპტიკურ-ბოჭკოვან ტექნოლოგიაზეა დაფუძნებული, სწორედ ამიტომ გამოიყენეს მასში 50G პასიური ოპტიკური ქსელი. შესაბამისად ეს არ ნიშნავს იმას, რომ შესაძლებელი იქნება მობილური 5G ქსელისა და ანტენების ჩანაცვლება ახალი მეათე თაობის ტექნოლოგიით.
