გაზეთ “ასავალ-დასავალის” 14-20 იანვრის ნომერში ჟურნალისტი გიორგი გიგაური ავითარებს აზრს, თითქოს საქართველოს ევროპაში ინტეგრაცია იდენტობის დაკარგვას გამოიწვევს, რის ერთ-ერთ მაგალითად შვედეთის კანონმდებლობა მოჰყავს, რომელიც მისი მტკიცებით, ტრანსგენდერის სქესში ეჭვის შეტანისათვის პატიმრობას ითვალისწინებს.
გიორგი გიგაური, “ასავალ-დასავალი”: „ანუ,თუ ყველაფერი „ევროპულად“ წავიდა და ვასილ მაღლაფერიძის საზმაუმაც „ივარგა“, 2019 წელს „ევროვიზიის“ კონკურსზე საქართველოს ტრანსგენდერი ანასტასია წარადგენს! წარმოიდგინეთ, რამხელა ნაბიჯი იქნება წინ, ევროპისკენ! მოკლედ, თუ ჩვენ „ნამეტნავად ევროპელები“ გავხდებით, გერმანიის მსგავსად, „მესამე სექსსაც“ დაგვიკანონებენ, შვედებივით, ტრანსგენდერთა „ქალობაში“ ეჭვის შეტანისთვის ციხეშიც ჩაგვსვამენ და ლუქემბურგივით, კაცზე დაქორწინებული პედერასტიც გვეყოლება მთავრობის მეთაურად! ევროპა გინდებლარიენ?! პაჟალუსტა!“
გიორგი გიგაურის განცხადება დეზინფორმაციულია, ვინაიდან შვედეთის სისხლის სამართლის კოდექსი არ იცნობს ისეთ დანაშაულს, როგორიცაა ტრანსგენდერის სქესში ეჭვის შეტანა და კრიმინალიზებულია მხოლოდ სიძულვილით მოტივირებული დანაშაული, რომელიც ჩადენილია ადამიანის რასის, კანის ფერის, ეროვნული ან ეთნიკური წარმომავლობის, ან სექსუალური ორიენტაციის გამო, რაც დამამძიემებელ გარემოებად ითვლება.
შვედეთის სისხლის სამართლის კოდექსში 2010 წელს შესული ცვლილებების თანახმად (24-ე თავი), დანაშაულის ჩადენა ადამიანის რასის, კანის ფერის, ეროვნული ან ეთნიკური წარმომავლობის, სექსუალური ორიენტაციის ან სხვა მსგავსი მოტივით პასუხისმგებლობის დამამძიმებელ გარემოებად მიიჩნევა:
“დანაშაულის ხარისხისა და იმ გარმოებების შეფასებისას, რომლებიც ამძიმებენ დანაშაულს, იმ დებულებებთან ერთად, რომლებიც გათვალისწინებულია თითოეული ტიპის დანაშაულისათვის, განსაკუთრებული ყურადღება უნდა მიექცეს:
(…)
(7) იყო თუ არა დანაშაულის მოტივი პირის, ეთნიკური ჯგუფის ან სხვა მსგავსი ჯგუფის შეურაცხყოფა რასის, კანის ფერის, ეროვნული ან ეთნიკური წარმომავლობის, სექსუალური ორიენტაციის ან სხვა მსგავსი გარემოების გამო”.
აღნიშნული მუხლი იმას ნიშნავს, რომ თუ ადამიანი ჩაიდენს, მაგალითად, ისეთ დანაშაულს, როგორიცაა ფიზიკური ძალადობა, ცემა და სხვა და ამ ქმედების მოტივი იქნება ადამიანის რასა, კანი, ფერი, ეთნიკური ან სექსუალური იდენტობა, ასეთი მოტივი დამამძიმებელ გარემოებად ჩაუთვლება. შესაბამისად, გიორგი გიგაურის განცხადება, თითქოს, შვედეთში ტრანსგენდერის სქესში ეჭვის შეტანისათვის საპატიმრო სასჯელია გათვალისწინებული, დეზინფორმაციულია.
