11 ივნისს ფეისბუქ-ანგარიშმა Загадки Человечества (კაცობრიობის თავსატეხები) გამოაქვეყნა ვიდეო სათაურით Падение НЛО в городе (ქალაქში ამოუცნობი მფრინავი ობიექტის ჩამოვარდნა), რომლის მიხედვითაც, ლოს-ანჯელესში ჩამოვარდა უცხოპლანეტელების ხომალდი, რომელიც ადგილობრივმა სამართალდამცავმა სტრუქტურებმა სასწრაფოდ გადამალეს, შემდეგ კი არიზონას შტატში არსებულ საიდუმლო სამხედრო ბაზაზე გადაიტანეს.
ვიდეო ლოს-ანჯელესში ამოუცნობი მფრინავი ობიექტის ჩამოვარდნას არ ასახავს. ვიდეოში გამოყენებული კადრების ნაწილი არასწორი აღწერით ვრცელდება, ხოლო ნაწილი ხელოვნური ინტელექტის გამოყენებით არის გენერირებული.
პირველი კადრი, რომელიც ვიდეოში ჩნდება, სულ მცირე 28 იანვრიდან ვრცელდება ინტერნეტ სივრცეში. ვიდეოში ჩანს, რომ მფრინავი ობიექტი ცაში დამახასიათებელ კვალს ტოვებს, რომელიც SpaceX-ის რაკეტის Falcon 9-ის გაშვების იდენტურია. Falcon 9-ის ერთ-ერთი გაშვება 2025 წლის 24 იანვარს მოხდა, ვიდეოს ადრეული ვერსიის გავრცელებამდე რამდენიმე დღით ადრე. ინტერნეტსივრცეში მარტივად იძებნება რაკეტის გაფრენის ამსახველი ვიდეოები და ფოტოები, რომლების ფეისბუქზე გავრცელებულ კადრებთან შედარებით, მსგავსება ცალსახად ჩანს.
კადრი ფეისბუქზე გავრცელებული ვიდეოდან/ Falcon 9 24 იანვარს, წყარო: George Rose/Getty Images/Falcon 9-ის გაშვება და მთვარე. წყარო: Dennis Houghton/Noozhawk
კადრები, რომლებზეც პოლიციის მობილიზაცია ჩანს, 6 ივნისიდან აშშ-ში, კალიფორნიის შტატში ლოს-ანჯელესში საპროტესტო აქციებთან არის დაკავშირებული.
ვიდეოს ერთ-ერთ ადრეული ვერსია ტიკ-ტოკ ანგარიშმა elisa.m.elias24-მა 10 ივნისს გამოაქვეყნა. მომხმარებელს ვიდეოს აღწერაში მითითებული აქვს, რომ პოლიცია ლოს-ანჯელესის მეორე ქუჩაზეა მობილიზებული (2nd street downtown LA) აღწერაში ასევე მითითებულია, რომ ვიდეო ტიკ-ტოკ მომხმარებლის loveghost_-ის პირდაპირი ჩართვიდან არის ჩაწერილი, რაც ვიდეოსაც ეტყობა. მარცხენა ზედა კუთხეში ჩანს, loveghost_ ანგარიშის სახელი.
Loveghost_- ის ტიკ-ტოკ გვერდზე პირდაპირი ეთერის ჩანაწერი ხელმისაწვდომი არ არის, რადგან ტიკ-ტოკი პირდაპირ ეთერის ჩანაწერებს არ ინახავს. თუმცა მის ანგარიშზე პოლიციის მობილიზაციის ამსახველი ორი ვიდეოა გამოქვეყნებული. ერთ-ერთ ვიდეოში ჩანს ლოს-ანჯელესის საჯარო ბიბლიოთეკის პატარა ტოკიოს ფილიალი.
კადრი ვიდეოდან/Google Earth Street View
ტრანსპორტის დეპარტამენტის შენობა და ჰილტონის სასტუმროს შენობა ვიდეოში
ტრანსპორტის დეპარტამენტის შენობა და ჰილტონის სასტუმროს შენობა Google Еarth Street View-დან
შესაბამისად ვიდეოები ნამდვილად ლოს-ანჯელესში მეორე ქუჩაზეა გადაღებული და ვიდეოების გავრცელების თარიღიც ქალაქში საიმიგრაციო სამსახურის წინააღმდეგ გამართული აქციების თარიღებსაც ემთხვევა.
ფეისბუქზე გავრცელებული ვიდეოდან კადრი, რომელიც თითქოს თვითმფრინავის კაბინიდან არის გადაღებული და უცხოპლანეტელების მფრინავ თეფშს ასახავს, ხელოვნური ინტელექტის გამოყენებით არის შექმნილი. ვიდეო 28 აპრილს ტიკ-ტოკ ანგარიშმა geox356-მა გამოაქვეყნა და აღწერაში მითითებული აქვს АI (ხელოვნური ინტელექტი).
Geox356 სისტემატურად აქვეყნებს უცხოპლანეტელებთან დაკავშირებულ და ხელოვნური ინტელექტის გამოყენებით შექმნილ ვიდეოებს.
ასევე ხელოვნური ინტელექტის გენერირების ნიშნებს შეიცავს კადრები, რომლებზე მფრინავი თეფშის ჩამოვარდნა და ქუჩაში ჩამოვარდნილი ამოუცნობი მფრინავი ობიექტი ჩანს. კადრები არარეალისტური და არაბუნებრივია და კომპიუტერით გენერირებული გრაფიკულ გამოსახულებას ჰგავს.
მოამზადეს ლევან დათიაშვილმა და თინათინ თვაურმა
მითების დეტექტორის ლაბორატორია
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
