14 აპრილს რუსულ მედიაში (tass.ru, vz.ru) და ფეისბუკ-ანგარიშზე გავრცელდა ინფორმაცია, რომ კიევის პოლიციამ და უსაფრთხოების სამსახურმა ახალგაზრდები რუსული მუსიკის მოსმენის გამო დააკავეს.
ინფორმაცია, თითქოს კიევში ახალგაზრდები რუსული მუსიკის მოსმენის გამო დააკავეს, უკონტექსტოდ ვრცელდება. რეალურად, ისინი ალკოჰოლური ზემოქმედების ქვეშ იყვნენ და გამვლელების შენიშვნაზე, რომლებიც მათ სუმის ტრაგედიას ახსენებდნენ და მუსიკის გამორთვას სთხოვდნენ, დაცინვით და მუსიკის ხმის აწევით რეაგირებდნენ.
კიევის პოლიციის საიტზე გამოქვეყნებულ ინფორმაციაში აღნიშნულია, რომ ახალგაზრდები ადმინისტრაციული წესით ნამდვილად დააკავეს. განცხადებაში ვკითხულობთ, რომ სოციალური ქსელების მონიტორინგის დროს, პოლიციამ ვიდეოს მიაგნო, რომელშიც ჩანდა ქუჩაში მყოფი ახალგაზრდა მამაკაცების ჯგუფი. ისინი ხმამაღლა უსმენდნენ რუსი შემსრულებლების მუსიკას. გამვლელების შენიშვნებისა და სუმის ტრაგედიის შეხსენების მიუხედავად, ახალგაზრდებმა რუსული მუსიკა არ გამორთეს, პირიქით, უფრო ხმამაღლა ჩართეს და მოქალაქეების დაცინვა დაიწყეს.
პოლიციამ ორი 17 წლის და ერთი 20 წლის ახალგაზრდა ადმინისტრაციული წესით დააკავა. სამართალდამრღვევები შემთხვევას იმით ხსნიან, რომ ალკოჰოლური ზემოქმედების ქვეშ იყვნენ.
პოლიციამ სამართალდამრღვევების წინააღმდეგ საქმე ადმინისტრაციული წესით აღძრა, წვრილმანი ხულიგნობისა და საზოგადოებრივ ადგილებში ალკოჰოლის მიღებისა და მისი ზემოქმედების ქვეშ გამოჩენის მუხლებით. ახალგაზრდებთან ერთად საქმე აღიძრა მათ მშობლებზე უკრაინის ადმინისტრაციული კოდექსის 184 -ე მუხლით, რაც ბავშვების აღზრდასთან დაკავშირებული ვალდებულებების შეუსრულებლობას გულისხმობს.
წყაროს შესახებ:
ფეისბუკ-ანგარიშს Георгий Кушиташвили დეზინფორმაცია წარსულშიც არაერთელ გაუვრცელებია.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომლებსაც ამ სტატიის საფუძველზე მიენიჭათ ვერდიქტი, Facebook-მა შესაძლოა, სხვადასხვა შეზღუდვა აამოქმედოს. შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
