6 იანვარს ფეისბუქ მომხმარებელმა, კახა სიხარულიძემ, გამოაქვეყნა ტრამპის მხარდამჭერი პოსტი, სადაც საუბრობდა აშშ-ს საპრეზიდენტო არჩევნების გაყალბებასა და ტრამპის გამარჯვების მსოფლიო მნიშვნელობაზე, პოსტს თან ერთვის ფოტო, რომელიც ავტორის განმარტებით, ტრამპის მხარდასაჭერად 6 იანვარს დაგეგმილ მსვლელობაში მონაწილეობის მისაღებად ვაშინგტონში წინასწარ (5 იანვარს) ჩასულ ადამიანებს ასახავს.
პოსტი შეიცავს დეზინფორმაციას, გამოყენებული ფოტო რეალურად ასახავს არა ტრამპის მხარდამჭერების შეკრებას 2021 წლის 5 იანვარს, არამედ 2018 წლის 24 მარტს ვაშინგტონში გამართულ “მარშს ჩვენი სიცოცხლისთვის,” რომელიც იარაღის ტარებაზე კონტროლის დაწესებას უჭრდა მხარს.
- ფოტო გადაღებულია “მარში ჩვენი სიცოცხლისთვის” გამართვის დღეს
გუგლის საძიებო სისტემაში ილუსტრაციის უკუძიების მეთოდის გამოყენებით მარტივად ვიგებთ, რომ ფოტო 2018 წლის 24 მარტს გადაიღეს, როდესაც ვაშინგტონში სტუდენტების მიერ ორგანიზებული იარაღზე კონტროლის დაწესების მხარდასაჭერი მსვლელობა “მარში ჩვენი სიცოცხლისთვის” (March for our lives) იმართებოდა.
“მარში ჩვენი სიცოცხლისთვის” სტონემენ დუგლასის სკოლაში მომხდარი სროლის (2018 წლის 14 თებერვალი) პასუხად ჩატარდა, სკოლაში შეჭრილმა შეიარაღებულმა კაცმა 17 ადამიანი შეიწირა. სხვადასხვა მოსაზრებით, იარაღის ტარებაზე კონტროლის არსებობის შემთხვევაში შესაძლებელი იქნებოდა ამ მოვლენის თავიდან აცილება. 24 მარტს გამართული მარშის მონაწილე სტუდენტები სწორედ იარაღის ტარებაზე კონტროლის გამკაცრებას ითხოვდნენ.
იდენტური ფოტო ყალბი აღწერით, თითქოს ის 2021 წლის 5 იანვარს ტრამპის ვაშინგტონში მყოფ მხარდამჭერებს ასახავს, აშშ-ც გავრცელდა. ფაქტების გადამოწმების ამერიკული პორტალის Lead Stories განმარტებით, ტრამპის მხარდამჭერების მსვლელობა საპრეზიდენტო არჩევნების შედეგების გასაპროტესტებლად დაგეგმილი 6 იანვარს იყო და 5 იანვარი აშშ-ს დედაქალაქში შეკრებების გარეშე მშვიდად მიმდინარეობდა, ამასთანავე 5 იანვარს აშშ-ს დედაქალაქში ღრუბლიანი ამინდი გახლდათ და წვიმა იყო მოსალოდნელი, გავრცელებული ფოტო კი მზიან დღეს ასახავს.
სტატია Facebook-ის ფაქტების გადამოწმების პროგრამის ფარგლებში მომზადდა. მასალებზე, რომელიც ამ სტატიის საფუძველზე Facebook-მა შესაძლოა, სხვადასხვა შეზღუდვა აამოქმედოს – შესაბამისი ინფორმაცია იხილეთ ამ ბმულზე. ჩვენი შეფასების გასაჩივრების და შესწორების შესახებ ინფორმაცია ხელმისაწვდომია ამ ბმულზე.
იხ. მასალის შესწორების დეტალური ინსტრუქცია.
იხ. გასაჩივრების დეტალური ინსტრუქცია.
